كشف الفنان أحمد فلوكس، اليوم السبت، عن رحلته التى تعرض خلالها لأعمال سحر، فى الفترة الماضية، مؤكدًا أنها تسببت له فى مشكلات كبيرة.
ونشر فلوكس صورتين، له عبر صفحته الرسمية بموقع التواصل الاجتماعى إنستجرام، معلقا “الصورتين دول مابيفرقوش عينى ولا عقلى”.
واشار فلوكس الى ان “الصورة اللى ببدلة دى كانت فى أسوأ فترة فى حياتى رغم إنى كنت ناجح وشركاتى بتنجح وبتحرك وبشتغل وكنت بستغرب أنا شكلى بيعجز ليه، وليه عامل كده، وليه الأبيض بقى كتير فى دقنى، وليه مش سعيد، وليه مش مظبوط، وتساؤلات كتير، رغم أنى كل شويه كنت بسافر أعمل عمرة، لكن شكلى، وحياتى، ونفسيتى، وتصرفاتى بتسوء للأسوأ.. فترة غريبة جدًا فى كل حاجة”.
وتابع فلوكس: “دى الفترة اللى اكتشفت فيها حاجات كتير، وحصل بعديها واقعة الأمن، دى الفترة اللى السحر والأعمال، والدمار، وشرور البشر، والخيانة، والغدر، والتوهان، ومش شايف حاجة، وكل ما هو ـ سيء ـ بيدمروا فيا وفى صحتى وفى حياتى، وأنا مش فاهم حاجة .. معمى البصيرة، والإحساس، عجوز من الداخل، مربوط فى حزن بلا سبب، رغم نجاحى مش عاوز أمثل، مش عاوز حاجة ولا فاهم حاجة، وكل شويه مستشفى، وكل شويه تعب والدكاتره مش لاقيه سبب طبى صريح”.
واستطرد: “الصوره التانية دى بعد ما ربنا عفانى وأكرمنى بالشفاء والبصيرة، والراحة، عفانى من أسوأ أنواع البشر، عفانى من السحر والأعمال، وأعطانى البصيرة لأرى من حولى جيدًا، وأرى قوة، وعظمة ربنا فى معطياته لينا، ورحمة الله الواسعة”.
واختتم أحمد فلوكس حديثه برسالة لجمهوره، قائلاً: “قربوا من ربنا واعلموا جيدًا أن لن يمسكم سوء.. نصيحة اختاروا الناس اللى تبقى فى حياتكم كويس.. وابعدوا عن كل شخص مؤذى.. وماتتخدعوش بالمظاهر والكلام وقربوا قوى من ربنا”.
